کراچی (ڈیسک) آل پاکستان مسلم لیگ کے سربراہ وسابق صدر جنرل پرویز مشرف کا کہنا ہے کہ ملک کو اس وقت تیسری سیاسی قوت کی ضرورت ہے عام انتخابات سے قبل پاکستان واپس آجاؤں گا
اے پی ایم ایل سندھ ساؤتھ ریجن کے تحت زینت اسکوائر ایف سی ایریا لیاقت آباد میں پارٹی کے ضلع وسطی کے دفتر کے افتتاح کے موقع پر منعقدہ تقریب سے ٹیلی فونک خطاب کرتے ہوئے سابق صدر پرویز مشرف کا کہنا تھا کہ آج مجھے بڑی خوشی ہوئی ہے کہ ضلع وسطی میں اے پی ایم ایل کا دفتر کھلا ہے ۔ آج اے پی ایم ایل کا لیاقت آباد میں عوامی اجتماع منعقد ہوا ہے ۔ یہ علاقہ ماضی میں ایم کیو ایم کا ہوا کرتا تھا۔ آج کے عوامی اجتماع میں اے پی ایم ایل میں ایم کیو ایم، پیپلز پارٹی، پاک سرزمین پارٹی، مسلم لیگ (فنکشنل)، پنجابی پختون اتحاد پارٹی اور دیگر جماعتوں سے سیکڑوں کارکنان شامل ہوئے ہیں۔
اس موقع پر خطاب کرتے ہوئے اے پی ایم ایل ساؤتھ ریجن کے صدر احمد حسین نے کہا کہ ضلع وسطی میں آج اے پی ایم ایل کے ڈسٹرکٹ آفس کا افتتاح ہو گیا ہے۔ جلد ضلع وسطی میں جلسہ کیا جائے گا ۔ انہوں نے کہا کہ کراچی میں جلد بڑے عوامی جلسے کا انعقاد کیا جائے گا
