کینبرا (نیوز ڈیسک) کرکٹ آسٹریلیا نے افغانستان ویمن کرکٹ ٹیم کا نمائشی میچ کرانے کا اعلان کیا ہے۔
ویمنز ایشز کے پہلے ٹیسٹ کے پہلے روز افغانستان ویمن ٹیم اور کرکٹ ود آؤٹ بارڈرز کی ٹیم ان ایکشن ہوں گی۔
کرکٹ آسٹریلیا کے مطابق ٹی ٹوئنٹی میچ 30 جنوری کو میلبورن میں جنکشن اوول گراؤنڈ میں کھیلا جائے گا۔
آسٹریلوی کرکٹ بورڈ کا کہنا ہے کہ آسٹریلیا میں موجود افغانستان ویمن کرکٹ ٹیم کے اراکین کی خواہش کو پورا کرنے کے لیے میچ کرانے کا فیصلہ کیا ہے۔
میچ خواتین کی کرکٹ میں شمولیت کا جشن منانے کے لیے منعقد ہونے والے تاریخی دن کا بھی حصہ ہوگا۔
کرکٹ آسٹریلیا نے بتایا کہ میچ آسٹریلیا میں مقیم افغانستان ویمن کرکٹ کی کھلاڑیوں اور دیگر اسٹیک ہولڈرز کے ساتھ مشاورت سے ترتیب دیا گیا ہے۔
چیف ایگزیکٹو کرکٹ آسٹریلیا نک ہاکلے نے کہا کہ کرکٹ اور کمیونٹی کے بہت سے لوگوں نے افغانستان ویمن ٹیم کی آسٹریلیا میں آباد ہونے میں مدد کی ہے، یہ میچ ان کے کام کا جشن منانے کے لیے ہے۔
واضح رہے کہ افغانستان حکومت نے خواتین کی کھیلوں پر پابندی عائد کر رکھی ہے جبکہ ماضی میں آسٹریلیا افغانستان کے خلاف ون ڈے سیریز بھی منسوخ کرچکا ہے۔