کراچی (ڈیسک) ناظم آباد میں مرحوم پولیس انسپکٹر کے بیٹے نے محبت میں ناکامی پر سرعام لڑکی کو چاقوکے کئی وار کرکے شدید زخمی کردیا۔ کراچی سینٹرل کے علاقے ناظم آباد پاپوش نگر چاندنی چوک کے قریب چاقو کے کئی وار لگنے سے 18 سالہ اواب دختر یوسف کو شدید تشویشناک حالت میں عباسی شہید اسپتال پہنچایا گیا جس کے چہرے، ہاتھ، کلائی اور ٹانگوں پر کئی زخم تھے۔ پولیس کے مطابق واردات میں ملوث ملزم اسامہ ولد احمد علی کو گرفتار کرکے چاقو بھی برآمد کرلیا گیا ہے۔ پولیس کے مطابق ملزم کا کہنا ہے کہ زخمی لڑکی سے اس کی دوستی تھی تاہم چند روز سے لڑکی نے رابطہ ختم کردیا تھا جس کی وجہ سے اس نے جان سے مارنے کی نیت سے اس پر حملہ کیا۔ پولیس کے مطابق ملزم ریٹائرڈ مرحوم پولیس انسپکٹر کا بیٹا ہے۔ پولیس نے مقدمہ درج کرکے مزید تفتیش شروع کردی ہے۔