کراچی (نیوز ڈیسک) آرمی چیف جنرل سید عاصم منیر نے کراچی میں نیشنل ایرو اسپیس سائنس اینڈ ٹیکنالوجی پارک کا افتتاح کر دیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نیشنل ایرواسپیس سائنس اینڈ ٹیکنالوجی پارک، سلیکون کراچی کی افتتاحی تقریب میں مہمان خصوصی تھے۔
ائیر چیف مارشل ظہیر احمد بابر سدھو نے آرمی چیف کا استقبال کیا۔
آئی ایس پی آر کے مطابق آرمی چیف نےنیشنل ایرو اسپیس سائنس اینڈ ٹیکنالوجی پارک کو قومی اور اسٹریٹجک اہمیت کا حامل منصوبہ قرار دیتے ہوئے کہا کہ یہ منصوبہ تکنیکی ترقی کوفروغ دے گا، قوم کے لیے خود انحصاری کا پلیٹ فارم ثابت ہوگا، منصوبہ نوجوانوں اور آئندہ نسلوں کے لیے بے پناہ فوائد کا باعث بنے گا۔
اس موقع پر آرمی چیف نے ایرو اسپیس سائنس کے شعبے میں پاک فضائیہ کی کوششوں کو سراہا۔
سربراہ پاک فضائیہ ائیر چیف مارشل ظہیر احمد بابر سدھو نے منصوبے کے وژن پر روشنی ڈالتے ہوئے اسے ایرو اسپیس، سائبر اور آئی ٹی کے حوالے سے بہترین منصوبہ قرار دیا۔
انھوں نے کہا کہ قومی سطح پر ابھرتی ٹیکنالوجی کے حصول کے لیے درست سمت میں قدم ہے، سماجی، اقتصادی، سکیورٹی اور سائنس کے شعبوں میں مشترکہ وژن ثابت ہوگا۔
آئی ایس پی آر کے مطابق آرمی چیف جنرل سیدعاصم منیر نے کور ہیڈ کوارٹرز کراچی کا دورہ بھی کیا جہاں آرمی چیف کو کراچی کور کی آپریشنل تیاریوں اور تربیتی امور پر بریفنگ دی گئی۔
آرمی چیف کو جوانوں اور شہدا کے خاندانوں کی فلاح و بہبود کے لیے اٹھائے گئے اقدامات سے بھی آگاہ کیا گیا۔