کراچی (نیوز ڈیسک) چیئرمین ایم کیو ایم پاکستان اور وفاقی وزیر خالد مقبول صدیقی نے کہا ہے کہ پاکستان کے عوام کی نمائندگی عوام نہیں، خاندان کر رہے ہیں، تلخیاں اتنی ہیں مگر ہم نے اپنے دل میں چھپا کر رکھی ہیں۔
کراچی میں تقریب سے خطاب کرتے ہوئے انہوں نے کہا کہ کراچی دنیا کا چیریٹی کا کیپیٹل ہے، یہ شہر پورے ملک کو خیرات دے رہا ہے۔
خالد مقبول صدیقی کا کہنا ہے کہ نظام سب سے بڑا دشمن ہے، نظام کے محافظ ہی بڑے دشمن ہیں، اس نظام کو گرانے کی ضرورت ہے اور کوئی راستہ نہیں۔
انہوں نے کہا کہ ہم جمہوریت کو بچانے کے لیے حکومت کا حصہ ہیں، ہمارا معاہدہ وفاقی حکومت کے ساتھ ہے، وفاق کی ذمے داری ہے کہ وہ اپنی ذمے داری پوری کرے، اب ہمیں خود نکلنا ہوگا، اپنے حق کے لیے آواز اٹھانی ہوگی۔
خالد مقبول صدیقی کا کہنا ہے کہ یہ شہر اپنی گلیوں، پانی، سڑکوں، تعلیم اور اسپتالوں کے لیے ٹیکس دے رہا ہے، حالت یہ ہے کہ ہم بتا بھی نہیں سکتے پھر بھی سمجھتے ہیں کہ آزاد ہیں۔
چیئرمین ایم کیو ایم نے مزید کہا کہ پاکستان دنیا کا آخری ملک ہے جہاں جاگیردارانہ نظام موجود ہے، ہم بڑی بےشرمی سے اس نظام کو جمہوریت کہتے ہیں، اسمبلی میں کسان کی نمائندگی جاگیردار کررہا ہے۔
ان کا یہ بھی کہنا ہے کہ ہمارے پڑوسی ملکوں نے بڑی آبادی کو اپنی طاقت بنایا، ٹیکنالوجی کے میدان میں آگے بڑھنے کی ضرورت ہے، موقع ملا ہے کراچی کو روکنا اب ناممکن ہے، پاکستان بنایا تھا، بچا بھی لیں گے اور تعمیر بھی کرلیں گے۔