ژوب (ـنیوز ڈیسک) سکیورٹی فورسز نے ژوب کے علاقے سمبازہ میں خفیہ اطلاع پر کیے گئے آپریشن کے دوران 5 دہشت گردوں کو ہلاک کردیا، فائرنگ کے تبادلے میں میجر سید علی رضا شاہ شہید ہوگئے۔
آئی ایس پی آر کے مطابق دہشت گردوں کی علاقے میں موجودگی کی اطلاع پر آپریشن کیا گیا۔
فائرنگ کے تبادلے میں آپریشن کو فرنٹ سے لیڈ کرنے والے میجر سید علی رضا شاہ اور حوالدار نثار احمد شہید ہوگئے، شہید میجر کا تعلق سرگودھا جبکہ حوالدار کا وہاڑی سے تھا۔
آئی ایس پی آر کے مطا بق سکیورٹی فورسز مادر وطن کے دفاع کے لیے بہادر جوانوں کی قربانیوں کو خراج تحسین پیش کرتی ہیں۔
آئی ایس پی آر نے مزید کہا کہ علاقے میں موجود دیگر دہشت گردوں کے خاتمے کے لیے کلیئرنس آپریشن جاری ہے۔
