کراچی (ڈیسک) پوری قوم قیام پاکستان کی 76سال پورے ہونے پر جشن آزادی منا رہی ہے، ایسے میں پاکستانی فنکاروں نے سوشل میڈیا پر خوبصورت پیغامات پر مبنی پوسٹیں شیئر کی ہیں۔
14اگست یوم آزادی کے موقع پر پیغام دیتے ہوئے نامور اداکار ہمایوں سعید نے کہا کہ ’’یومِ آزادی مبارک۔ اللہ ارضِ پاک کو قوت اور پاکستانی قوم کو ایسی صفات سے نوازے جس سے وطن عزیز ترقی اور خوشحالی کی جانب گامزن ہو۔ پاکستان زندہ باد‘‘۔
پاکستانی شہریوں نے ایکس ڈاٹ کام پر ان کے پیغام پر پسندیدگی کا اظہار کیا ہے۔
یوم آزادی پر پیغام دیتے ہوئے عدنان صدیقی کا کہنا تھا کہ پاکستان کے 76 ویں یوم آزادی پر آئیے ہم اس عظیم جدوجہد کو یاد کریں جس کے نتیجے میں وطن عزیز وجود میں آیا۔ انہوں نے کہا مستقبل کے چیلنجز کا مقابلہ کرنے کے لیے ہمیں متحد ہونا ہوگا کیوں کہ امید، اتحاد اور خوش حالی کا مرکز پاکستان ہمارا مستقبل ہے۔ پاکستان زندہ باد۔
اداکار فیصل قریشی نے بھی یوم آزادی کی مناسبت سے اپنے ٹوئٹر اکاؤنٹ پر قومی پرچم کی تصویر کے ساتھ پاکستان زندہ باد لکھا ہے۔