کراچی (ڈیسک) شہر قائد آج بھی شدیدی گرمی کی لپیٹ میں رہے گا جبکہ درجہ حرارت 44 سینٹی گریڈ کو چھو ئے گا
محکمہ موسمیات نے کراچی میں ہیٹ ویو جاری کردیا ہےشہر کا درجہ حرارت آج بھی 44 ڈگری سینٹی گریڈکو چھوئے گا۔ سمندری ہوائیں تیسرے روز بھی بند ہونے کے باعث شہریوں کو آج بھی گرم ہواؤں اور چلچلاتی دھوپ کا سامنا رہے گا۔ تاہم آج شمال کی جانب سے ہلکی رفتار سے گرم ہوائیں چلیں گی جب کہ دن کے اوقات میں ہو امیں نمی کا تناسب 10 فیصد سے بھی کم رہے گا۔ صبح ساڑھے 9 بجے کراچی کا درجہ حرارت 37 ڈگری سینٹی گریڈ ریکارڈ کیا گیا۔ محکمہ موسمیات کا کہنا ہے کہ ہیٹ ویو کا سلسلہ جمعرات تک برقرار رہے گا
دوسری جانب شہر میں جاری شدید گرمی کے باعث سندھ مدرسہ یونیورسٹی میں آج ہونے والے امتحانات موخر کردیئے گئے ہیں۔ ایس ایم آئی یو میں 22 سے 24 مئی تک ہونے والے امتحانات کی تاریخ کا اعلان بعد میں کیا جائے گا۔ رجسٹرار سندھ مدرسہ یونیورسٹی کے مطابق 25 مئی سے شیڈول بقیہ امتحانات مقررہ وقت پر منعقد ہوں گے۔
واضح رہے کراچی میں گزشتہ تین روز سے شدید گرمی کی لہر جاری ہے، جب کہ گرمی، ہواؤ کی بندش اور کے الیکٹرک کی جانب سے کی جانے والی غیراعلانیہ لوڈ شیڈنگ نے عوام کا جینا عذاب کیاہوا ہے۔ ایدھی فاؤنڈیشن کے سربراہ فیصل ایدھی کے مطابق کراچی میں حالیہ گرمی کے سبب چند روز کے دوران 60 افراد جاں بحق ہوچکے ہیں۔
اندرون سندھ میں بھی گرمی کی شدت برقرار ہے محکمہ موسمیات کے مطابق دادو میں درجہ حرارت 30، لاڑکانہ میں 33، موئن جو دڑو، پڈعیدن، سکھرمیں 34 اورچھورمیں درجہ حرارت 35 سینٹی گریڈ ریکارڈکیاگیا
