کراچی (ڈیسک) سندھ پولیس میں ڈرائیورز اور پولیس کانسٹیبلز کی گریڈ 7 کی 4569 اسامیوں پر بھرتیوں شروع کردی گئیں۔
امیدواروں کے پاس متعلقہ اضلاع کا ڈومیسائل، تعلیمی قابلیت اور طبی معیار کا ہونا لازمی ہے۔ امیدوار 31 مارچ 2023 تک آن لائن درخواستیں جمع کروا سکتے ہیں۔
سندھ پولیس میں بھرتیوں کے حوالے سے ڈی آئی جی اسٹیبلشمنٹ کی جانب سے مراسلہ جاری کردیا گیا۔ پولیس حکام کے مطابق کراچی رینج میں مجموعی طور پر 1362 اسامیوں پر ڈسٹرکٹ ساؤتھ کیلئے 173، سٹی 104، کیماڑی 226، ایسٹ 283، ملیر 132، کورنگی 58، سینٹرل 275 اور ویسٹ کیلئے 111 امیدوار درکار ہیں۔

حیدرآباد پولیس رینج کیلئے 909، شہید بے نظیر آباد رینج کیلئے 304، سکھر رینج سے 566 جبکہ لاڑکانہ رینج کیلئے 820 اسامیوں پر بھرتیاں شروع کی جارہی ہیں۔
سندھ پولیس کے اسپیشل سکیورٹی یونٹ کیلئے گریڈ 7 کے ڈرائیور اور پولیس کانسٹیبل کی بھرتیوں کیلئے 361 امیدوار درکار ہیں۔
حکام کے مطابق ایس ایس یو میں بھرتی کیلئے سندھ کے تمام اضلاع کے ڈومیسائل کے حامل امیدوار درخواستیں دے سکتے ہیں۔ تسلیم شدہ بورڈ آف سیکنڈری ایجوکیشن سے میٹرک پاس اور (آن لائن درخواست فارم کی آخری تاریخ تک) کارآمد موٹر کار ڈرائیونگ لائسنس رکھنے والے امیدوار اہل قرار پائیں گے۔

امیدوار کا کم از کم قد 5 فٹ 6 انچ، سینہ کم از کم 33 انچ ہونا لازمی ہے۔ امیدوار کو 10 منٹ میں 1600 میٹر کی دوڑ کرنا لازم ہوگی۔
آن لائن درخواستیں جمع کرانے کی آخری تاریخ تک امیدوار کی عمر 28 سال سے کم ہونا لازمی ہے۔
اہلیت کیلئے خواتین کا قد 5 فٹ اور 14 منٹوں میں 800 میٹر واک کرنا لازم قرار دیا گیا ہے۔