اسلام آباد (ڈیسک) معروف نعت خواں جنید جمشید کے یوم پیدائش کے موقع پر ان کی خدمات کو بھر پور انداز میں خراج تحسین پیش کیا گیا۔
پاپ گلوکار اور نعت خواں جنید جمشید 3ستمبر 1964کو پیدا ہوئے۔ انھوں نے پاپ موسیقی گروپ وائٹل سائنز کے نمائندہ گلوکار کی حیثیت سے شہرت حاصل کی۔
وہ یونیورسٹی آف انجینئرنگ اینڈ ٹیکنالوجی، لاہور کے فارغ التحصیل تھے۔
1987میں دل دل پاکستان کی ریلیز کے ساتھ ہی وہ شہرت کی بلندیوں تک پہنچ گئے۔
ان کی پاپ گلوگاری کے دور میں جنید آف وائٹل سائنز 1994، اس راہ پر 1999اور دل کی بات 2002ریلیز ہوئے تھے۔
1994میں جنید جمشید کی پہلی گانوں کی البم منظرِ عام پر آئی۔
2004میں انہوں نے موسیقی کو خیر آباد کہہ کر مذہبی تعلیمات اور تبلیغ کا راستہ اختیار کرلیا، اس کے ساتھ ہی ان کا رجحان اسلامی تعلیمات کی طرف بڑھ گیا اور آہستہ آہستہ انھوں نے موسیقی کی صنعت کو خیر آباد کہہ دیا اور پھر وہ نعت خوان اور تاجر کے طور پر جانے جاتے رہے۔
جنید جمشید جے ڈاٹ بوتیک کے مالک تھے، جس کی شاخیں ملک بھر میں ہیں۔
واضح رہے کہ جنید جمشید 7دسمبر 2016کو پی آئی اے فلائیٹ 661کے حادثے میں وفات پا گئے۔
52سالہ جنید جمشید چترال میں تبلیغی دورے کے بعد اسلام آباد واپس آ رہے تھے۔ ان کی پرواز حویلیاں کے قریب گر کر تباہ ہو گئی تھی جس میں عملے کے پانچ ارکان سمیت تمام 48افراد جاں بحق ہوگئے تھے۔
واضح رہے کہ جنید جمشید کو 2018میں ستارہ امتیاز سے نوازا گیا تھا۔
جنید جمشید کی سالگرہ کے موقع پر مختلف ادبی، سماجی اور شو بز انڈسٹری حلقوں کی جانب سے ان کی خدمات کو بھر پور انداز میں خراج تحسین پیش کیا گیا۔