ڈیسک ) پاکستان کے سب سے بڑے میگا ایونٹ پی ایس ایل کا فائنل لاہور میں ہوگا یا نہیں؟ پنجاب حکومت کی جانب سے سرخ یا ہری جھنڈی دکھائے جانے کا آج امکان۔ کرکٹ دیوانے ٹکٹوں کے انتظار میں انتظار کی سولی پر لٹک گئے ہیں۔
5 مارچ کو شیڈول میگا ایونٹ کے فائنل سے متعلق تاحال اگرمگر کی صورتحال برقرار ہے۔ کرکٹ بورڈ کو پنجاب حکومت کا گرین سگنل درکار ہے اور حکومت کو سکیورٹی ادارو ں کی رپورٹ کا انتظار۔ چیئرمین پی ایس ایل نجم سیٹھی نے آج یعنی 25 فروری سے لاہور میں ٹکٹوں کی دستیابی کی یقین دہانی کروائی تھی۔ ٹکٹیں ملنا تو دور ابھی ان کی چھپائی بھی شروع نہ ہو سکی۔وزیر قانون پنجاب رانا ثنا اللہ کے مطابق وزیراعلیٰ پنجاب شہباز شریف اور وزیراعظم نوازشریف سے حتمی مشاورت کے بعد آج فائنل کے حتمی وینیو کا اعلان کیا جا سکتا ہے۔دوسری جانب کل وزیراعلیٰ شہباز شریف کی زیرصدارت کابینہ کمیٹی برائے امن و امان کا اجلاس ہوا۔ اجلاس کے دوران صوبے میں امن و امان کی مجموعی صورتحال پر غور کیا گیا۔ وزیراعلیٰ پنجاب نے سکیورٹی اداروں سے پی ایس ایل فائنل کے حوالے سے مزید تجاویز طلب کیں