اسکردو(ڈیسک)پاک فضائیہ کے سربراہ سہیل امان کا کہنا ہے کہ ہم امن پسند قوم ہیں لیکن ہم ہر طرح کے چیلنج کے لیے تیار ہیں،پی اے ایف کے لیے کوئی بھی صورتحال مشکل نہیں،قوم کو دشمن کےبیانات پر رتی بھرپریشان ہونے کی ضرورت نہیں۔
ذرائع کے مطابق پاک فضائیہ کے سربراہ نے بھارتی دھمکیوں کے بعداپنے تمام فارورڈ ایئربیس آپریشنل کردئیے۔بھارتی ائیر چیف کی دھمکیوں کے پیش نظر پاک فضائیہ کے تمام فارورڈ آپریٹنگ بیس مکمل آپریشنل کردیئے گئے ہیں ۔اس سلسلے میں سیاچن کے قریب پاک فضائیہ کے جنگی طیاروں کی تربیتی پروازیں جاری ہیں۔ایئرچیف مارشل سہیل امان نےسیاچن میں فارورڈ آپریشن ایئربیس میں آپریشنل تیاریوں کا جائزہ لینے کے لئےدورہ کیا ۔پاک فضائیہ نےجنگی تیاریوں کا بھرپورمظاہرہ کیا جس کو ایئر چیف نے خوب سراہا۔انہوں نے آپریشنل مشقوں میں حصہ لیتے ہوئے جنگی طیارہ میراج طیارہ خود اڑایا۔
اسکردو میں فارورڈ ایئر بیس کے دورے کے موقع پر میڈیا سے بات کرتے ہوئے ایئر چیف سہیل امان کا کہنا تھا کہ اسکردو قادری ایئر بیس پر تربیتی مشقیں کی جا رہی ہیں،پاکستان ایئر فورس دنیا کی بہترین ایئر فورس میں سے ہے،ہماری آپریشنل تیاریوں کے آگے یہ معمول کی بات ہے،پی اے ایف کے لیے کوئی بھی صورتحال مشکل نہیں،ضرب عضب کے مشنز ہوں یارد الفساد، پاک فضائیہ کا بھرپورکردارہے، ہم سارا سال ہرلمحے تیاررہتے ہیں، یہ معمول کی آپریشنل سرگرمی ہےاورہمیں کسی کو یہ بتانے کی ضرورت نہیں کہ ہم تیار ہیں۔ایئرچیف نے کہا کہ قوم کودشمن کے بیانات پررتی بھر پریشان ہونے کی ضرورت نہیں، قوم کو اعتماد ہونا چاہیے کہ پاک فضائیہ سرحدوں کی حفاظت کے لیئے ہر دم تیار ہے۔ اگر کسی جانب سے بھی مہم جوئی کا سوچا گیا تو ہماری جانب سے پوری طاقت سے جواب ملے گا، اگر دشمن نے جارحیت کی تو ہمارا جواب ان کی نسلیں یاد رکھیں گی۔
