سکھر (ڈیسک) وزیر اعلیٰ سندھ مراد علی شاہ کا کہنا ہے کہ عمران خان کو کر کٹ تو آتی ہے لیکن انہیں سیاست سیکھنے کی ضرورت ہے
سکھر میں میڈیا سے گفتگو کر تے ہو ئے وزیر اعلیٰ سند ھ مراد علی شاہ کا کہنا تھا کہ عمران خان نے جلسے کیے تو کچھ لوگ آگئے، انہیں لگا کہ پورا ملک ان کے ساتھ ہے جب کہ ایسا نہیں ہے، عمران خان کو کرکٹ تو آتی ہے مگر سیاست کرنا ابھی سیکھنا ہے، انہیں ابھی سیاست سیکھنے کی ضرورت ہے اور وہ جلد سیاست سیکھ جائیں گے
وزیر اعلیٰ سند ھ نے کہا کہ آئی جی پولیس کے ساتھ کوئی معاملات نہیں تھے، البتہ ان سے متعلق فیصلے پرتحفظات ہیں لیکن عدالت کے حکم پر عمل کررہے ہیں۔ آئی جی سندھ کا معاملہ میڈیا نے اٹھایا، آگے بھی یہی سب ہوگا تاہم یہ معاملات انتظامی ہیں، اس پر قانونی ماہرین سے مشاورت کررہے ہیں۔
مراد علی شاہ کا کہنا تھا کہ سندھ میں امن کی صورتحال باقی صوبوں سے بہتر ہے، کراچی، حیدرآباد اور سکھر میں انٹرنیشنل میچز کرائے جائیں، کراچی میں انٹرنیشنل کرکٹ میچوں کے لیے پی سی بی سے رابطہ کریں گے
انہوں نے مزید کہا کہ الیکشن اپنے وقت پر ہی ہوں گے اور پی ٹی آئی نے سندھ سے چند نشستیں جیتیں مگر وہ اس سے بھی ہاتھ دھو بیٹھے گی۔ انہوں نے کہا کہ مردم شماری کے نتائج پر ہمارا موقف واضح ہے۔
