اسلام آباد(اسٹاف رپورٹر)برطانیہ   نے سی پیک منصوبے میں شامل ہونے کی خواہش کا اظہار کردیا جبکہ برطانوی ہائی کمیشنز تھامس ڈریو کا کہنا تھا کہ سی پیک میں شمولیت اختیار کرنا برطانیہ کے لیے باعث خوشی ہوگا۔

اسلام آباد میں میڈیا سے گفتگو  کرتے ہوئے برطانوی ہائی کمشنرتھامس ڈریونے کہا کہ رواں سال پاکستان اور برطانیہ کے مابین اعلی سطح کے دورے ہوں گے اور باہمی سفارتی تعلقات کی 70 ویں سالگرہ پر تقاریب منعقد ہوں گی، سی پیک میں شامل ہونے کے لیے پیشکش موجود ہے، سی پیک میں شامل ہونا برطانیہ کے لیے باعث خوشی ہو گا اور برطانیہ سی پیک میں حصہ لینے کے لیے تیار ہے۔

تھامس ڈریوکا مزید  کہنا تھا کہ پاکستان میں جمہوریت کا مستقبل روشن ہے اور ضرب عضب کے بعد پاکستان میں سیکیورٹی کی صورتحال بہتر ہوئی ہے،دہشتگردی کے خلاف پاکستان کی قربانیوں کی قدر کرتے ہیں اور ہم خطے میں امن کے لیے مذاکرات کے حامی ہیں۔ ہمیں امید ہے کہ حکومت پاکستان لاپتہ افراد کو بازیاب کرا لے گی۔