ترکیہ (ڈیسک) پاکستانی شو بز کی معروف، سینئر اور خوبرو اداکارہ عتیقہ اوڈھو اب ترکی ڈراموں میں جلوہ افروز ہونے جا رہی ہیں۔ عتیقہ اوڈھو ترکی ڈرامے ’کویو بیاز‘ میں اداکاری کے جوہر دکھائیں گی۔
عتیقہ اوڈھو کے ہمراہ ترکی کے مشہور اداکار نیسا بولکباشی اتاکان ہوگورین، اتابیق محسن اور ایبرو اکیل کام کرتے نظر آئیں گے۔
اس حوالے سے عتیقہ نے انسٹا گرام پر اپنی پوسٹ شیئر کی ہے جس میں انھوں نے اپنے چاہنے والوں کو بتایا کہ وہ پاکستانی انڈسٹری سے نکل کر بین الاقوامی انڈسٹری میں قدم رکھ رہی ہیں۔ ترکی میں ایک پراجیکٹ کا حصہ بننے جا رہی ہیں، جلد اپنے مداحوں کو کو ترک ڈراموں میں نظر آئیں گی۔
یہ ڈرامہ ٹی آر ٹی ڈیجیٹل اسکرینز پر نشر کیا جائے گا ، ڈرامہ کے ہدایت کار بلنٹ اسبیلن ہیں۔ اس کے علاوہ ٹی وی میزبان توصیق حیدر بھی ترک ڈرامے میں کردار ادا کریں گے۔
ترکی کی مشہور سیریل ارتغرل غازی کی اسلامی دنیا اور پاکستان میں مقبولیت کے بعد پاکستان میں ترکی کے ڈرامے ذوق و شوق سے دیکھے جانے لگے ہیں۔ اسی طرز پر اب ترکی میں پاکستانی اداکارہ کی انٹری سے ان ڈراموں کی عوام میں مقبولیت میں مزید اضافے کی توقع کی جا رہی ہے۔