اسلام آباد (ڈیسک) اسلام آباد ہائی کورٹ نے 9 مئی کے واقعات پر پی ٹی آئی رہنما اسد عمر کی حفاظتی ضمانت منظور کرتے ہوئے جمعرات تک متعلقہ عدالت سے رجوع کرنے کی ہدایت کی ہے۔
اسلام آباد ہائی کورٹ کے جسٹس محسن اختر کیانی اور جسٹس طارق محمود جہانگیری پر مشتمل ڈویژن بینچ نے پی ٹی آئی رہنما اسد عمر کی لاہور کے تھانہ گلبرگ میں درج دہشت گردی کے مقدمے میں حفاظتی ضمانت کی درخواست پر سماعت کی۔
درخواست میں استدعا کی گئی تھی کہ لاہور کی متعلقہ ٹرائل کورٹ سے رجوع کے لیے کم از کم دو ہفتے کی حفاظتی ضمانت منظور کی جائے اور عدالت ایسا حکم دے کہ ملک بھر میں کہیں سے بھی اس مقدمے میں گرفتار نا کیا جا سکے۔
عدالت نے 25 ہزار روپے کے مچلکوں کے عوض اسد عمر کی حفاظتی ضمانت منظور کرتے ہوئے انہیں جمعرات تک لاہور کی متعلقہ کورٹ سے رجوع کرنے کی ہدایت کی۔
یاد رہے کہ 9 مئی کے واقعات کے بعد اسد عمر کے خلاف 10 مئی کو لاہور کے تھانہ گلبرگ میں دہشت گردی دفعات کے تحت مقدمہ درج کیا گیا تھا۔