ہریانہ (ڈیسک) بھارت میں 20 سال کے دوران 50 خواتین سے شادیاں کرکے انہیں کنگال کرنے والا دھوکے باز شوہر آخرکار پکڑا گیا۔
ملزم کے خلاف پولیس گرو گرام سے تعلق رکھنے والی خاتون کی شکایت درج کرانے کے بعد حرکت میں آئی ۔
خاتون نے پولیس کو شکایت کی کہ وہ ایک ایپ کے ذریعے ملزم سے ملی اور بعدازاں اس سے شادی کرلی۔
تاہم شادی کے 3 دن بعد اس کا دھوکے باز شوہر 20 لاکھ روپے لوٹ کر فرار ہوگیا۔
بھارتی ریاست ہریانہ کے شہر گرو گرام کی پولیس نے تپیش نامی ملزم کو اوڑیسہ سے گرفتار کرلیا۔
پولیس کے مطابق جمشید پور سے تعلق رکھنے والے تپیش نے پہلی شادی 1992 میں کولکتہ میں کی تھی۔
شادی کے 8 سال بعد وہ بیوی اور 2 بیٹیوں کو چھوڑ کر غائب ہو ا تھا ۔
پولیس کا کہنا ہے کہ ملزم نے نوجوانوں کو ملازمتیں دلانے کا جھانسہ دے کر دھوکا دینے کی بھی کوشش کی مگر ناکام رہا ۔
بعد ازاں ملزم نے ایک ایپ کے ذریعے درمیانی عمر کی مطلقہ، بیوہ اور شادی شدہ خواتین سے روابط بڑھا کر شادی کے بعد لوٹ مار کی وارداتیں شروع کیں۔
پولیس کے مطابق ملزم نے گزشتہ 20 سال کے دوران 50 سے زائد خواتین سے شادیاں کیں اور انہیں لوٹ کر غائب ہوا۔
پولیس کا کہنا ہے کہ ملزم کو حراست میں لینے کے بعد مزید تفتیش کی جا رہی ہے۔