کندھ کوٹ (نیوز ڈیسک) کندھ کوٹ میں پرائمری اسکول ٹیچر اللہ رکھیو نندوانی کے قتل کا مقدمہ کرم پور تھانے میں درج کرلیا گیا۔
مقتول کے بھائی مولا بخش کے مدعیت میں دہشت گردی کی دفعات کے تحت درج مقدمے میں 5 نامزد سمیت 7 ملزمان شامل ہیں جن کی تلاش جاری ہے۔
پولیس کے مطابق ٹیچر کے قتل میں ڈاکو صدام نندوانی کا گینگ ملوث ہے، پرائمری اسکول ٹیچر اور نندوانی گروپ کے درمیان دشمنی چل رہی تھی۔
پولیس حکام کے مطابق جاری آپریشن کے دوران پولیس اور ڈاکوؤں کے درمیان فائرنگ کا تبادلہ ہوا ہے۔
دریں اثناء کندھ کوٹ کے کچے میں مغویوں کی بازیابی کےلیے بھی پولیس نے آپریشن کیا ہے۔
پولیس کے مطابق آپریشن میں بنگلانی گینگ کا اہم کارندہ شریف بنگلانی مارا گیا جبکہ ایک ڈاکو زخمی ہوا ہے۔
ہلاک ڈاکو کی لاش پولیس کی تحویل میں ہے جبکہ ڈاکو اپنے زخمی ساتھی کو لے کر فرار ہوگئے ہیں۔
پولیس کے مطابق کارروائی کے دوران ڈاکوؤں کے متعدد ٹھکانے تباہ کردیے جبکہ متعدد مشتبہ افراد کو حراست میں لے لیا گیا ہے۔
کندھ کوٹ: ٹیچر کے قتل کا مقدمہ درج، آپریشن میں ایک ڈاکو ہلاک
