اسلام آباد(ڈیسک)پاکستان انٹر نیشنل ایئر لائن (پی آئی اے) کی پہلی ائیر سفاری پرواز ملکی اور غیر ملکی سیاحوں کو پاکستان کے حسین پہاڑی سلسلہ کی سیر کرانے کے لئے ہفتہ کی صبح اسلام آباد سے روانہ ہو گئی۔
پی آئی کے ترجمان عبداللہ خان کی طرف سے یہاں جاری بیان کے مطابق ایئر سفاری پرواز میں 13 ملکوں کی شہریت رکھنے والے 91 مسافرسوار ہیں ، وفاقی وزیر توانائی حماد اظہر بھی ذاتی حیثیت میں سیاحوں میں شامل ہیں۔ پاکستان کی حسین پہاڑی سلسلے کو دیکھنے کیلئے سیاحوں کا جوش و خروش دیدنی ہے اور بڑی کثیر تعداد میں غیر ملکی مہمانوں نے مسرت بھرے جذبات کا اظہار کیا ہے۔ پرواز کے ٹو، نانگا پربت، براڈ پیک اور دنیا کے بلند ترین گلیشیر کی سیاحت کرائے گی۔
