بیجنگ(ڈیسک)پاکستان انٹرنیشنل ایئرلائنز (پی آئی اے) نے چینی خودمختارعلاقے سنکیانگ اور پاکستان کے درمیان چارٹرڈ کارگو پروازیں شروع کردی ہیں۔

یہ بات پی آئی اے کے کنٹری ڈائریکٹر قادر بخش سانگی نے بدھ کو بتائی۔ انہوں نے کہا کہ پاکستانی قومی ایئر لائن کی کاشغر ایئرپورٹ سے اسلام آباد کے لئے روزمرہ استعمال کی ضروری اشیا کی حامل چارٹرڈ کمرشل فلایئٹ بدھ کی صبح پاکستان روانہ ہوئی۔ قادر بخش سانگی نے مزید بتایا کہ اس ماہ کے آخر تک 13کارگو پروازیں متوقع ہیں۔ پی آئی اے کو چینی حکام نے حال ہی میں کونمینگ، شنزہن اور سنکیانگ سے چارٹرڈ کارگو پروازیں شروع کرنے کی منظوری دی ہے۔ انہوں نے اس اعتماد کا اظہار کیا کہ چین کے مختلف شہروں کے لئے چارٹرڈ کارگو پر وازوں سے چین اور پاکستان کے درمیان کاروباری اور تجارتی سرگرمیوں میں اضافہ کرنے میں مدد ملے گی۔