ملتان (ڈیسک) پاکستان اور انگلینڈ کے مابین تین ٹیسٹ میچوں کی سیریز جاری ہے۔ دونوں ٹیموں کے درمیان پہلا ٹیسٹ راولپنڈی میں اختتام پذیر ہو چکا جس میں انگلینڈ نے پاکستان کو 74 رنز سے شکست دے کر 1-0کی برتری حاصل کر لی ہے۔
سیریز کا دوسرا میچ ملتان میں شیڈولڈ ہے جس کی تیاریاں مکمل کر لی گئی ہیں۔ دونوں ٹیموں کی آمد سے قبل ہی مرکزی شاہراہوں پر سکیورٹی کے انتظامات کر لیے گئے ہیں، پاکستان اور انگلینڈ کی ٹیموں کا جن ہوٹلوں میں قیام ہے ان کے اطراف کی سڑکیں آمد و رفت کے لیے بند کر دی گئی ہیں۔
ٹریفک کو گزرنے کے لیے متبادل راستوں کا انتظام کیا گیا ہے، شہریوں کو ہدایات جاری کر دی گئی ہیں کہ وہ اسٹیڈیم کے اطراف والے راستوں کے بجائے متبادل راستوں کا انتخاب کریں، زکریا یونیورسٹی کو بھی میچ کے دوران بند کر دیا گیا ہے۔
بدھ کے روز دونوں ٹیمیں اسٹیڈیم میں پریکٹس کریں گی جب کہ 9تا 13دسمبر پاکستان اور انگلینڈ کے درمیان ٹیسٹ سیریز کا دوسرا میچ کھیلا جائے گا۔