مانسہرہ (نیوز ڈیسک) مسلم لیگ (ن) کے قائد نواز شریف نے کہا ہے کہ بہت عمدہ پاکستان چھوڑ کرگیا تھا، جن لوگوں نے بگاڑنا تھا وہ بگاڑ کر چلے گئے، پاکستان کودوبارہ پٹڑی پرلانا آسان کام نہیں۔
نواز شریف نے مانسہرہ میں انتخابی جلسہ سے خطاب میں کہاکہ ملک سے لوڈشیڈنگ کا خاتمہ کیا اورسستی بجلی فراہم کی، لوگوں کو روزگار دیا سستی گیس فراہم کی۔
ان کا کہنا تھا کہ ہماری حکومت کو مدت پوری کرنے دی گئی ہوتی تواگلی حکومت بھی ہماری ہوتی۔
انھوں نے کہا کہ ہمارے دور میں مہنگائی نہیں تھی ان ظالموں نے پاکستان کا ستیاناس کردیا، آج ہم دنیا میں بہت پیچھے رہ گئے ہیں، ملک کی دوبارہ تعمیرکرنا ہوگی۔
ان کا کہنا تھاکہ خیبرپختونخوا والوں آپ بھی اس جھوٹے شخص کے جھانسے میں آگئے، آپ نے اس جھوٹے شخص کو ووٹ دیا تھا، جن کی 10 سال خیبرپختونخوا کی حکومت رہی ہے انہوں نے کیا کیا؟
نوازشریف نے اعلان کیا کہ اب خیبرپختون خوا کو سنوارنے کا وقت آگیا ہے، مانسہرہ میں ائیرپورٹ بنائیں گے اور اللہ نے موقع دیا تومانسہرہ میں میڈیکل کالج بنائیں گے۔
انھوں نے مزید کہا کہ خوشی ہورہی کے ہم دوبارہ ملے ہیں لیکن ملکی حالات دیکھ کر خوشی نہیں ہورہی۔
ان کا مزید کہنا تھا کہ جن ہاتھوں سے موٹروے بنائی جب وہ تیار ہوئی تو میں جیل میں تھا، اگر مجھے نہ ہٹایا جاتا تو اسلام آباد سے لے کر مانسہرہ اور مظفرآباد تک ٹرین چل رہی ہوتی۔