اسلام آباد (ڈیسک) دنیا کے دیگر حصوں کی طرح پاکستان میں بھی آج (ہفتہ کی) رات سالانہ ارتھ آور منایا جائے گا جس کا عنوان ‘ زمین کے لئے ایک گھنٹہ دیں’ رکھا گیا ہے۔
دنیا بھر میں لاکھوں لوگ صرف ایک گھنٹے کے لیے لائٹس بند کر کے اس دن کو منائیں گے۔
دنیا بھر میں لوگوں کی ایک بڑی تعداد ماحول کے تحفظ کے لیے ارتھ آور منانے کے لیے ایک گھنٹے کے لیے غیر ضروری لائٹس اور الیکٹرانک آلات کو بند کر کے کاربن کے اخراج کو کم کر سکتی ہے۔
اقوام متحدہ کے سیکرٹری جنرل انتونیو گوترس نے اپیل کی ہے کہ آج رات 8 بجے تمام لائٹس ایک گھنٹے کے لیے بند کر دیں۔
انہوں نے کہا کہ ارتھ آور کے تحت بڑے پیمانے پر ماحولیاتی سرگرمی کی جائے گی، ہم سب کو موسمیاتی کارروائی میں اپنا کردار ادا کرنا ہوگا۔
انہوں نے کہا کہ میں دنیا کے تمام شہریوں سے اپیل کرتا ہوں کہ وہ جہاں کہیں بھی ہوں مقامی وقت کے مطابق رات 8 بجے ایک گھنٹے کے لیے اپنی لائٹس بند کر دیں۔
2007 کے دوران ورلڈ وائلڈ لائف فنڈ (ڈبلیو ڈبلیو ایف) کی طرف سے ارتھ آور منانے کا آغاز کیا گیا جس کے بعد سے موسمیاتی تبدیلی کے بارے میں بیداری پیدا کرنے کی یہ سرگرمی ہر سال منائی جاتی ہے۔
یہاں یہ بات قابل ذکر ہے کہ اقوام متحدہ کی جانب سے پاکستان سمیت دنیا بھر میں ہر سال مارچ کے آخری ہفتے کی رات ارتھ آور منایا جاتا ہے جس کا مقصد لوگوں کو آلودگی کے منفی اثرات اور دیگر عوامل کے ماحول پر پڑنے والے منفی اثرات کے بارے میں سوچنے کی دعوت دینا ہے۔