ہری پور (ڈیسک) ہری پور کی تحصیل غازی میں سری کوٹ کے قریب وین گہری کھائی میں گر گئی ،ایک ہی گھر کے شوہر ،بیوی سمیت 4افراد جاں بحق اور تین بچے شدید زخمی ہو گئے، شدید زخمیوں کو ٹراما سنٹر ہری پور منتقل کر دیا گیا۔
اطلاعات کے مطابق غازی تھانہ کی حدود سریکوٹ کے دشوار گزار پہاڑی علاقے سنگھر کے رہائشی عاطف شاہ جو اٹامک انرجی میں ملازم ہے ،فیملی کے ہمراہ کیری وین میں گھر سے جا رہے تھے کہ پلوسو سر کے موڑ سے وین بے قابو ہو کر گہری کھائی میں گر گئی جس کے نتیجے میں عاطف شاہ ولد امین شاہ ساکن سنگر سری کوٹ، رقیہ بی بی زوجہ عاطف شاہ، زینب بی بی زوجہ شاہد شاہ عمر 31سال، ایان ولد شاہد شاہ عمر 3سال جاں بحق ہو گئے۔
جبکہ محمد علی ولد ناصرشاہ عمر 14/15سال،عبد اللہ ولد شاہد شاہ عمر7/8سال ، عبید شاہ ولد عاطف شاہ شدید زخمی ہوئے جن کو فوری طور پر نزدیک ٹراما سنٹر ہری پور منتقل کر دیا گیا۔
حادثہ کی اطلاع ملتے ہی غازی پولیس موقع پر پہنچ گئی، حادثہ کی جگہ کا معائنہ کیا تاہم مقامی افراد نے امدادی کارروائیاں کرتے ہوئے حادثہ میں جاں بحق ہونے والوں کو نکالا اور شدید زخمی بچوں کو ٹراما سنٹر منتقل کیا جن کی حالت تشویشناک بتائی جاتی ہے۔
پولیس نے بتایا کہ حادثہ صبح سویرے پیش آیا متوفی عاطف شاہ فیملی کے ہمراہ گھر سے جا رہے تھے کہ ان کی گاڑی غفلت سے کھائی میں جا گری جس سے3افراد موقع پر جاں بحق ہو گئےجبکہ گھر کاسر راہ عاطف شاہ جو گاڑی چلا رہا تھا اسپتال جاتے ہوئے راستے میں فوت ہو گیا۔