وزیر اعظم عمران خان آج کرتار پور کوریڈور کا سنگ بنیا د رکھیں گے جس میں شرکت کے لیے بھارت کی معروف شخصیت نوجوت سنگھ سدھو سمیت بھارتی وفد پاکستان پہنچ گیا ہے۔

کرتارپور کوریڈو کے سنگ بنیاد کی تقریب کی تیاریاںمکمل کرلی گئی ہیں، جس  کا سنگ بنیادآج وزیراعظم عمران خان  رکھیں گے، تقریب میں پاک بھارت سمیت دنیا بھر سے سکھ یاتری  اور مختلف ممالک کے سفارتکار اور عالمی مبصرین بھی شرکت کریں گے۔جبکہ ڈی جی آئی ایس پی آر کے مطابق آرمی چیف جنرل قمر جاوید باجوہ بھی کرتارپور کوریڈور کی افتتاحی تقریب میں شرکت کریں گے۔

بھارت سے واہگہ بارڈ پہنچنے والی وزیر ہرسمرت کور بادل کا کہنا تھا کہ آج وہاں جارہی ہوں جہاں بابا گرونانک نے 18 برس گزارے، آج بہت جذباتی ہوں، خوابوں میں بھی نہ سوچا تھا کہ کرتار پور جاسکوں گی، میرے جیسے لاکھوں لوگوں کی دعائیں رنگ لارہی ہیں۔

(این این آئی)