ملتان(ڈیسک)پاکستان انٹرنیشنل ایئرلائنز نے ملتان سے سکردو کے لیے ہفتہ وارپروازیں شروع کرنے کافیصلہ کیا ہے۔

افتتاحی پرواز 25جولائی کوصبح آٹھ بجے ملتان سے سکردو کے لیے روانہ ہوگی اور ڈیڑھ گھنٹے کے بعد سکردو پہنچے گی۔ڈسٹرکٹ منیجر پی آئی اے ملتان باقر نقوی نے اے پی پی سے بات چیت کرتے ہوئے بتایا کہ پی آئی اے نے یہ فیصلہ جنوبی پنجاب کے عوام کی سیاحتی مقامات تک رسائی آسان بنانے کے لیے کیاہے۔ اس سے پہلے انہیں سکردو کی پرواز کے لیے ملتان سے لاہور یا اسلام آباد جانا پڑتاتھاجس سے اخراجات بھی بڑھ جاتے تھے اوروقت بھی زیادہ لگتاتھا۔انہوں نے کہا کہ یہ سیزنل پروازیں ہیں اور ابتدائی طورپر ہم ہفتے میں ایک پرواز شروع کررہے ہیں۔ 25جولائی کو سکردو جانے والی پرواز 29جولائی کوسکردو سے صبح دس بجے ملتان کے لیے روانہ ہوگی۔انہوں نے مزید کہا کہ مسافروں کے رجحان کو دیکھتے ہوئے مستقبل میں پروازوں کی تعداد ہفتے میں دوبار بھی کی جاسکتی ہے۔ انہوں نے مزید کہا کہ جنوبی پنجاب کے عوام کے لیے یہ بہت بڑی سہولت ہے۔ پی آئی اے اس خطے کی عوام کو زیادہ سے زیادہ سہولتیں فراہم کرنے کے لیے کوشاں رہے گی۔