اسلام آباد (ڈیسک) سال 2023میں بہت سے تجربہ کار پاکستانی اداکار انتقال کر گئے۔ قوی خان، شکیل،ماجد جہانگیر،واسوخان،طارق جمیل پراچہ،خالد سعید بٹ ،شبیر رانا، شعیب ہاشمی امجد اسلام امجد اور ضیا محی الدین جیسے لیجنڈ اداکار اور ادب نگار انتقال کر گئے۔
یہ تمام سلبرٹیز اداکاری کی اکیڈمی سمجھے جاتے تھے جن میں امجد اسلام امجد ،شعیب ہاشمی ،قوی خان اور ضیا محی الدین اپنی ذات میں خود ایک ادارہ تھے جن کی دنیائے اداکاری اور ادب میں خدمات کو ہمیشہ یاد رکھا جائے گا ۔
کامیڈین ماجد جہانگیر 10جنوری 2023کو انتقال کر گئے۔ ماجد جہانگیر پرفالج کا حملہ ہوا ، وہ پانچ سال تک فالج کے ساتھ زندہ رہے۔ ان کا انتقال لاہور کے نجی اسپتال میں ہوا۔
بلوچی لوک فنکار واسو خان طویل علالت کے بعد فروری میں انتقال کر گئے،ان کو گلوکارشہزاد رائے کے ساتھ گانے سے شہرت حاصل ہوئی، واسو خان طویل العمری اور غربت کی وجہ سے بیماری کا شکار ہوگئے تھے۔
امجد اسلام امجد 78سال کی عمر میں 10 فروری کو انتقال کرگئے، ان کا انتقال نیند میں ہوا۔
13 فروری کو ضیا محی الدین 91 سال کی عمر میں کراچی میں انتقال کر گئے، وہ بیمار تھے اور اسپتال میں لائف سپورٹ پر تھے۔ وہ اپنی ذات میں اکیڈمی کی حیثیت رکھتے تھے۔
ٹیلی ویژن اداکار قوی خان 6مارچ کو کینیڈا میں انتقال کر گئے۔ ان کی عمر 80سال تھی۔ قوی خان کینسر کے مرض میں مبتلا تھے ، وہ کینیڈا میں سپرد خاک ہیں۔
6 مئی کو پاکستانی اداکار، میزبان، مصنف اور استاد شعیب ہاشمی انتقال کر گئے۔
پانی دا بلبلا سے شہرت پانے والے یعقوب عاطف 12مئی کو انتقال کر گئے۔ وہ اپنی پرجوش اسٹیج پرفارمنس کی وجہ سے بہت مشہور تھے۔
29جون کو پی ٹی وی کے تجربہ کار اداکار یوسف شکیل 85سال کی عمر میں دل کا دورہ پڑنے سے انتقال کر گئے۔ وہ 29مئی 1938کو پیدا ہوئے، ٹیلی ویژن اور فلم کے ایک شاندار اداکار تھے جنہوں نے عروسہ، انکل عرفی، آنگن سمیت متعدد ہٹ پراجیکٹس میں کام کیا جن میں شہزوری، افشاں اور ان کہی نمایاں ہیں ، شکیل یوسف کا اصل نام یوسف کمال تھا۔
ڈرامہ گیسٹ ہائوس کے مشہور ٹی وی اداکار شبیر مرزا ستمبر کے آغاز میں انتقال کر گئے تھے، ان میں کینسر کی تشخیص ہوئی تھی۔