لاہور (نیوز ڈیسک) لیجنڈ گلوکار راحت فتح علی خان نے اپنے سابق منیجر سلمان احمد پر بلیک میلنگ اور یو ٹیوب چینل کے بغیر اجازت استعمال پر مقدمہ کرادیا۔
راحت فتح علی خان نے سابق منیجر سلمان احمد کے خلاف ایف آئی اے لاہور کے سائبر کرائم سرکل میں شکایت درج کرادی ہے۔
راحت فتح علی خان نے مؤقف اختیار کیا کہ مختلف پیشہ ورانہ خدمات کے ساتھ سلمان احمد کو منیجر کی ذمہ داری بھی سونپی تھی، سلمان احمد مجھے بدنام اور بلیک میل کرنے اور دھمکیاں دینے میں ملوث ہے۔
گلوکار نے کہا کہ سلمان احمد نے دھمکی دی کہ اگر اس کے ساتھ کام کرنا بند کیا تو وہ میرا کیرئیر تباہ کر دے گا، ایسی ویڈیوز بھی لیک کرنے کی دھمکی دی جس سے مجھے اور میرے خاندان کو نقصان پہنچے گا۔
انھوں نے مزید کہا کہ سلمان احمد نے میرے یو ٹیوب چینل کا غیر قانونی طور پر کنٹرول بھی سنبھال لیا، غیر قانونی طور پر اس کا لوگو اور نام تبدیل کردیا، میرے یو ٹیوب چینل کے 7.96 ملین سبسکرائبر ہیں، یو ٹیوب اکاؤنٹ کو چالاکی سے ایڈٹ کیا گیا جس سے مجھے مالی نقصان ہوا۔

گلوکار کے مطابق سلمان احمد متحدہ عرب امارات کا رہائشی ہے اور اس کا یہ عمل وہاں کے قوانین کے بھی منافی ہے۔
یاد رہے سلمان احمد سے تعلق ختم کرنے کے اعلان ساتھ ہی راحت فتح علی خان کی تشدد پر مبنی ویڈیو جاری ہوئی تھی۔
ذرائع نے دعویٰ کیا ہے کہ سلمان احمد نے راحت فتح علی خان کو مبینہ طور پر بلیک میل کرنے کے لیے یہ ویڈیو بنائی تھی۔