اسلام آباد (ڈیسک) وفاقی وزیر اطلاعات ونشریات مریم اورنگزیب نے کہاہے کہ عمران خان خود تماشہ بن چکا ہے، عمران صاحب اب آپ کے تماشے بند ہونے کا وقت آگیاہے۔ ہفتہ کو جاری بیان میں وفاقی وزیرنے کہاکہ چار سال سے فارن ایجنٹ نے ملک و قوم کو تماشہ بنا رکھا ہے، عمران خان کے تمام تماشے بے نقاب ہو چکے ہیں، انہوں نے کہا عمران خان نے اِس ملک میں 2014 سے تماشہ لگایا ہوا ہے، چار سال نالائقی ، نااہلی، بہتان اور جھوٹ کا تماشہ لگائے رکھا۔ انہوں نے کہاکہ عمران خان نے عوام کے روزگار اور مہنگائی پہ تماشہ لگایا، چار سال سے ملک میں لوٹ مار کے تماشے لگائے، گھڑیوں اور ہاروں کے لوٹ مار کے تماشے ہوتے رہے، لوگوں کی پگڑیاں اچھالنے، شہدا کے خلاف غلیظ مہم چلانےاور اداروں میں بغاوت کے تماشے لگائے، انہوں نے کہاکہ ذاتی سیاست پر قومی مفادات قربان کرنے کے تماشے لگائے گئے، عمران صاحب اب آپ کے تماشے بند ہونے کا وقت ہوچکا ہے۔