اسلا م آباد (ڈیسک) وفاقی وزیر اطلاعات و نشریات فواد چوہدری کا   کہنا ہے کہ علیم خان کی گرفتاری کے بعد اپوزیشن اب کیا بہانہ بنائے گی۔

اسلام آباد میں میڈیا سے گفتگو کرتے ہوئے وفاقی وزیر اطلاعات فواد چوہدری نے کہا کہ جیسے ہی علیم خان کی گرفتاری کا کہا گیا تو انہوں نے وزیراعلی پنجاب عثمان بزدار کو اپنا استعفیٰ بھیج دیا، جس طرح علیم خان نے فوری استعفیٰ دیا اس سے کلچر کا واضح فرق نظر آتا ہے اب پتہ چلتا ہے کہ پاکستان تحریک انصاف میں کیا کلچر ہے اور باقی جماعتوں میں کیا ہے۔

فواد چوہدری نے کہا کہ علیم خان کی گرفتاری کے بعد سمجھ نہیں آتا اپوزیشن اب کیا بہانہ بنائے گی، ہم احتساب کے عمل کی مکمل حمایت کرتے ہیں اور اداروں کے ساتھ کھڑے ہیں، اداروں کا مضبوط ہونا پاکستان کے لیے مضبوطی کا باعث ہے۔

قبل ازیں ایک تقریب سے خطاب کرتے ہوئے وزیراطلاعات کا کہنا تھا کہ اخبارات کی بندش کی وجہ معیشت نہیں بلکہ ٹیکنالوجی ہے، ٹیکنالوجی میں بہت زیادہ جدت آ رہی ہے، اب میڈیا کو جدید ٹیکنالوجی پر انحصار کرنا ہو گا اور مستقبل کیلئے ریسرچ کرنا ہو گی۔

ان کا مزید کہنا تھا کہ گزشتہ حکومت نے میڈیا بجٹ کو بہت زیادہ بڑھا دیا تھا  جب کہ اخبارات کی بندش کے باعث بے روزگاری کا مسئلہ پیدا ہو رہا ہے۔