اسلام آباد (نیوز ڈیسک) ملک بھر میں عام انتخابات کے لیے امیدواروں کے کا غذات نامزدگی آج سے جمع کیے جارہے ہیں۔
الیکشن کمیشن نے گزشتہ روز کاغذات نامزدگی کا اجرا کیا تھا، امیدوار صبح ساڑھے 8 بجے سے لے کر شام ساڑھے 4 بجے تک کاغذات حاصل کرسکتے ہیں جب کہ کاغذات نامزدگی جمع کرانے کا سلسلہ بھی آج سے شروع کردیا گیا ہے۔
امیدوار 20 سے 22 دسمبر تک متعلقہ آر او آفس میں کاغذات نامزدگی جمع کرواسکتے ہیں جس کے بعد امیدواروں کی ابتدائی فہرست 23 دسمبر کو جاری ہوگی۔
کاغذات نامزدگی کی جانچ پڑتال 24 سے 30 دسمبر تک ہوگی۔
13 جنوری کو امیدواروں کو انتخابی نشانات الاٹ کیے جائیں گے اور عام انتخابات کے لیے پولنگ 8 فروری کو ہوگی۔
یاد رہےکہ گزشتہ روز این اے 194 لاڑکانہ سے بلاول بھٹو زرداری کے لیےکاغذات نامزدگی حاصل کیے گئے۔
سربراہ استحکام پاکستان پارٹی جہانگیر ترین کے لیے 3حلقوں سے کاغذات نامزدگی لیے گئے۔