اسلام آباد (نیوز ڈیسک) صدر آصف علی زرداری اور وزیراعظم شہباز شریف نے شمالی وزیرستان میں خوارج کے خلاف کامیاب آپریشن پر سکیورٹی فورسز کو خراج تحسین پیش کیا۔
صدر آصف زرداری نے 6 دہشت گردوں کو جہنم واصل اور 6 کو زخمی کرنے پر سکیورٹی فورسز کو سراہا اور ان کی پیشہ ورانہ مہارت کی تعریف کی۔
صدر مملکت نے دہشت گردی کے مکمل خاتمے کے قومی عزم کا اظہار کرتے ہوئے کہا کہ پاکستان کی بہادر فورسز دہشتگردوں کے خاتمے کے لیے کارروائیاں جاری رکھیں گی۔
دریں اثناء وزیراعظم شہباز شریف نے بھی شمالی وزیرستان میں خوارج کے خلاف کامیاب آپریشن پر سکیورٹی فورسز کی تعریف کی ہے۔
انہوں نے 6 خارجیوں کو ہلاک اور 6 کو گرفتار کرنے پر فورسز کی صلاحیتوں کی تعریف کی۔
وزیراعظم نے کہا ہے کہ دہشتگردی کی عفریت کے مکمل خاتمے تک اس کے خلاف جنگ جاری رکھیں گے۔
انہوں نے کہا کہ دہشت گردی اور انتشار پھیلانے والوں کے خاتمے کے لیے قوم سکیورٹی فورسز کے شانہ بشانہ ہے۔
یاد رہے کہ شمالی وزیرستان کے علاقے اسپن وام میں سکیورٹی فورسز نے آپریشن میں 6 خوارج ہلاک اور 6 کو زخمی کیا۔