کراچی (نیوز ڈیسک) پاک بحریہ نے قانون نافذ کرنے والے اداروں کے ساتھ شمالی بحیرہ عرب میں مشترکہ آپریشن کے دوران 14 کروڑ 56 لاکھ مالیت کی شراب ضبط کرلی۔
پاک بحریہ، پاکستان میری ٹائم سکیورٹی ایجنسی اور پاکستان کسٹمز انٹیلی جنس نے جوائنٹ میری ٹائم انفارمیشن اینڈ کوآرڈینیشن سینٹر کے تعاون سے مشترکہ انٹیلی جنس بیسڈ آپریشنکرکے شراب کی 4104 بوتلیں برآمد کرلیں۔
ضبط کی گئی شراب کی مالیت تقریباً 14 کروڑ 56 لاکھ روپے ہے۔
ضبط شدہ اشیاء کو مزید قانونی کارروائی کے لیے پاکستان کسٹمز کے حوالے کردیا گیا۔
ڈائریکٹر جنرل پبلک ریلیشنز (نیوی) کے مطابق موجودہ سکیورٹی صورتحال کے تناظر میں جہاں جرائم پیشہ افراد اپنے مذموم عزائم کے سبب پاکستان کو بدنام کرنے میں مصروف عمل ہیں، وہاں پاک بحریہ، پی ایم ایس اے اور پاکستان کسٹمز کا کامیاب مشترکہ آپریشن اس عزم کا اعادہ ہے کہ ملکی بحری اور زمینی سرحدوں کے تحفظ کو یقینی بنانے کے لیے افواج ہمہ وقت تیار ہیں۔
ڈائریکٹر جنرل پبلک ریلیشنز (نیوی) کے مطابق پاک بحریہ اور پی ایم ایس اے سمندر میں نظم و نسق قائم کرنے کے لیے قومی ذمہ داریاں اور فرائض نبھاتے رہیں گے۔