پشاور (ڈیسک) ضلع خیبر کے علاقے جمرود میں ریسکیو 1122 کی ٹیم نے کارروائی کرتے ہوئے ٹیڈی بازار میں 10 میٹر گہرے گٹر نما کنویں میں گرنے والی 50سالہ خاتون کو زندہ بچا لیا۔
ریسکیو 1122خیبر کے مطابق جمرود کے علاقے ٹیڈی بازار میں نامعلوم وجوہات کی بنا پر 50 سالہ خاتون 10 میٹر گہرے گٹر نما کنویں میں گرگئی جسے ریسکیو 1122 کی ٹیم نے کنویں سے زندہ باہر نکال لیا۔
ذرائع نے بتایا کہ خاتون کے کنویں میں گرنے کی اطلاع ملتے ہی ریسکیو کا عملہ فوری طور پر جائے وقوعہ پر پہنچا اور پیشہ ورانہ مہارت استعمال کرتے ہوئے بزرگ خاتون کو کنویں سے نکالا، خاتون کو ابتدائی طبی امداد فراہم کی گئی، بعد ازاں انھیں اسپتال روانہ کیا گیا ۔
علاقہ مکینوں نے ریسکیو عملے کے کام کی تعریف کی اور بروقت ریسپانس دینے پر ادارے کی خدمات کو سراہا۔