لاہور (ڈیسک) ذکا اشرف نے پاکستان کرکٹ بورڈ کی نئی مینجمنٹ کمیٹی کی ذمے داریاں سنبھال لی ہیں۔
انھیں پاکستان کرکٹ بورڈ کی نئی منیجنگ کمیٹی کا چیئرمین مقرر کر دیا گیا ہے۔
پی سی بی ہیڈکوارٹرز لاہور پہنچنے پر ذکا اشرف کا اعلیٰ عہدیداروں نے استقبال کیا۔
کمیٹی کا پہلا اجلاس آج نیشنل کرکٹ اکیڈمی میں ہوگا جس کی صدارت چیئرمین ذکا اشرف کریں گے، اجلاس کا ایجنڈا کرکٹ کے حوالے سے آئندہ کی حکمت عملی طے کرنا ہے۔
نئی مینجمنٹ کمیٹی 4 ماہ کے لیے تشکیل دی گئی ہے جو کرکٹ بورڈ اور آئی سی سی سمیت دیگر امور دیکھے گی۔
وفاقی کابینہ نے سمری کے ذریعے پی سی بی کی نئی مینجمنٹ کمیٹی بنانے کی منظوری دی تھی، کمیٹی کے دیگر اراکین میں کلیم اللّٰہ خان، اشفاق اختر، مصدق اسلام، عظمت پرویز، ظہیر عباس، خرم سومرو، خواجہ ندیم، مصطفیٰ رمدے اور ذولفقار ملک شامل ہیں۔
