واشنگٹن (نیوز ڈیسک) امریکی صدر جوبائیڈن نے ری پبلکن پارٹی کے امیدوار ڈونلڈ ٹرمپ کو صدارتی انتخابات میں جیت پر فون کرکے مبارک باد دی۔
امریکی میڈیا کے مطابق صدر جوبائیڈن نے ڈونلڈ ٹرمپ کو ملاقات کے لیے وائٹ ہاؤس میں بھی مدعو کیا۔ صدر جمعرات کو امریکی قوم سے خطاب کریں گے۔
وائٹ ہاؤس سے جاری بیان میں کہا گیا کہ جوبائیڈن نے اقتدار کی پرامن منتقلی کو یقینی بنانے کا عہد کیا۔
ٹرمپ سے بات چیت کے دوران صدر جوبائیڈن نے امریکا کو اکٹھا کرنے کے لیے کام کرنے کی اہمیت پر زور دیا۔
امریکی میڈیا کے مطابق صدر جوبائیڈن نے نائب صدر اور ڈیموکریٹک پارٹی کی امیدوار کملا ہیرس کو بھی فون کیا۔