ڈی جی خان (نیوز ڈیسک) تونسہ میں پولیس چیک پوسٹ پر حملہ کرنے والے دہشت گرد جوابی کارروائی پر بھاگ نکلے،حملے کے نتیجے میں 7 اہلکار زخمی ہوگئے۔
ریجنل پولیس آفیسر سجاد حسن خان کے مطابق گزشتہ شب تونسہ میں خیبر پختونخوا بارڈر پر واقع پولیس چیک پوسٹ جھنگی پر دہشت گردوں نے حملہ کیا تھا۔
آر پی او نے بتایا کہ پنجاب پولیس کے جوانوں نے بہادری سے دہشت گردوں کا مقابلہ کیا۔
انہوں نے بتایا کہ حملہ آور راکٹ لانچرز سمیت دیگر اسلحے سے لیس تھے جو چیک پوسٹ پر قبضہ کرنا چاہتے تھے تاہم پولیس نے حملہ آوروں کو ناکام بنا دیا۔
حملے میں 7 پولیس اہلکار زخمی ہوئے جنہیں تحصیل ہیڈ کوارٹر اسپتال تونسہ منتقل کیا گیا جہاں سے 5 اہلکاروں کو مرہم پٹی کے بعد فارغ کر دیا گیا جبکہ 2 کا علاج جاری ہے۔
پولیس کی بھاری نفری دہشت گردوں کی تلاش میں سرحدی علاقے میں آپریشن کررہی ہے۔