ایپو (نیوز ڈیسک) ملائیشیا میں پاکستان اور نیوزی لینڈ کے درمیان ہونے والا آج کا ہاکی میچ ایک ایک گول سے برابر ہوگیا۔
اذلان شاہ ہاکی کپ کے آخری راؤنڈ کے میچ کے دوسرے کوارٹر تک دونوں ٹیمیں کوئی گول نہ کرسکیں۔
میچ کے دوران کیویز کو 2 پنالٹی کارنر بھی ملے لیکن وہ فائدہ نہ اٹھا سکی، پاکستان کو بھی گول کرنے کے مواقع ملے تاہم کامیابی نہیں ملی۔
تیسرے کواٹر کے چھٹے منٹ میں نیوزی لینڈ نے اپنا کھاتا کھولا اور میچ کا پہلا گول کرنے میں کامیاب ہوگئی لیکن آٹھویں منٹ میں پاکستانی ٹیم کے کھلاڑی ابوبکر محمود نے پنالٹی کارنر پر گول کرکے مقابلہ برابر کردیا۔
تیسرے کواٹر میں پاکستانی ٹیم کو کئی اوپن چانس ملے تاہم نیوزی لینڈ کی دفاعی لائن نے تمام حملے ناکام بنا دیے۔
چوتھے کوارٹر میں بھی دونوں ٹیمیں ایک دوسرے پر برتری حاصل کرنے میں ناکام رہیں۔
یاد رہے کہ پاکستان ایونٹ کے فائنل کے لیے پہلے ہی کوالیفائی کرچکا ہے جہاں اس کا مقابلہ جاپان سے ہوگا۔