نئی دلی (ڈیسک) بھارتی تحقیقاتی ایجنسی نے کل جماعتی حریت رہنما یاسین ملک کو سزائےموت دلوانے کیلیے ہائیکورٹ سے رجوع کرلیا۔
کشمیر میڈیا سروس کے مطابق بھارتی تحقیقاتی ایجنسی یاسین ملک کو سزائے موت دلوانے کا مذموم ارادہ رکھتی ہے۔
کل جماعتی حریت کانفرنس نے بھارتی تحقیقاتی ایجنسی کے اقدام کی مذمت کرتے ہوئے کہا کہ مودی حکومت نظربند حریت رہنماؤں کو سیاسی انتقام کا نشانہ بنا رہی ہے۔
حریت کانفرنس کے بیان میں کہا گیا کہ قابض فوج کو بےگناہ کشمیریوں کو قتل، گرفتار اور تشدد کرنےکی کھلی چھوٹ ملی ہوئی ہے۔
بیان میں کہا گیا کہ بھارت بدترین جبر کے باوجود نظربند حریت رہنماؤں کےحوصلے توڑنے میں ناکام رہا ہے اور حریت رہنما اپنے مؤقف پر چٹان کی طرح ڈٹے ہوئے ہیں۔
حریت کانفرنس نے اقوام متحدہ اور عالمی برادری سے نظربند حریت رہنماؤں کی رہائی کے لیے بھارت پر دباؤ ڈالنے کی اپیل کی ہے۔
واضح رہے کہ یاسین ملک جھوٹے مقدمے میں نئی دلی کی بدنام زمانہ تہاڑ جیل میں عمر قید کاٹ رہے ہیں۔