کراچی (ڈیسک) وزیر اعلیٰ سندھ مراد علی شاہ نے اعظم سواتی کو لانے کے لیے سندھ حکومت کا طیارہ استعمال ہونے کی سختی سے تردید کی ہے۔ کراچی میں تقریب کے بعد میڈیا سے گفتگو کرتے ہوئے مراد علی شاہ نے کہا کہ مشکل معاشی صورتحال ہے، ایک دوسرے پر الزام تراشی کی بجائے مل کر استحکام لانا ہے۔ وزیر اعلیٰ سندھ کا کہنا ہے کہ جو ادارے کام کرتے ہیں ان پر تنقید کی جاتی ہے۔ مراد علی شاہ نے کہا کہ ہم تعمیر کی بات کر رہے ہیں جبکہ کچھ لوگ توڑ تاڑ کی بات کر رہے ہیں۔انھوں نے کہا کہ تعلیم میں بے قاعدگیوں کے حوالے سے وزیر تعلیم جواب دے چکے ہیں۔ ابھی تک سیلاب متاثرین کو ریلیف نہیں ملا، متاثرین کے سر پر چھت نہیں ہے اور وہ ٹینٹ میں رہ رہے ہیں۔سب ساتھ مل کر ملک کو مشکل وقت سے نکالیں۔