کراچی (ڈیسک) ہتک عزت کیس میں پاکستان پیپلز پارٹی کے رہنما سعید غنی نے پاکستان تحریک انصاف کے رہنما حلیم عادل شیخ کو عدالت میں معاف کردیا۔
سعید غنی کی جانب سے اپوزیشن لیڈر سندھ اسمبلی حلیم عادل شیخ کے خلاف ہتک عزت کیس کی سماعت ایڈیشنل ڈسٹرکٹ اینڈ سیشن جج کی عدالت میں ہوئی۔ سعید غنی اور حلیم عادل شیخ اپنے وکلا کے ہمراہ عدالت میں پیش ہوئے۔ جج نے سعید غنی سے مکالمہ کرتے ہوئے پوچھا آپ نےحلیم عادل شیخ کےخلاف ہتک عزت کا کیس کیا ہے؟ کیا پیسے عزت سے بڑھ سکتے ہیں؟ آپس میں مل بیٹھ کر صلح کر لیں۔ سعید غنی کا کہنا تھا یہ معافی نامہ لکھ کر دیں تو کیس ختم کرنے کے لیے تیار ہوں، جس پر حلیم عادل شیخ کے وکیل نے کہا مل بیٹھ کر بات کے لیے تیار ہیں۔ عدالت نے کہا کہ یقیناً زخم کا گھاؤ بھر جاتا ہے لیکن زبان سے پہنچائی گئی تکلیف ختم نہیں ہوتی، لیکن اللہ تعالیٰ کے پسندیدہ راستے کو اختیار کیا جائے اور دونوں آپس میں صلح کر لیں۔ عدالت نے سعید غنی اور حلیم عادل کو ہدایت کی کہ دل بڑا کریں اور ایک دوسرے کو معاف کردیں۔ بعد ازاں سعید غنی نے کمرہ عدالت میں حلیم عادل شیخ کو گلے سے لگا لیا۔ فریقین کے وکلاء کی جانب سے مشاورت کے لیے مہلت کی استدعا پر کیس کی مزید سماعت 16 فروری تک ملتوی کردی گئی۔