لاہور (ڈیسک) پاکستان تحریک انصاف کے مرکزی رہنما بابر اعوان نے مسلم لیگ (ن) کے قائد اور سابق وزیر اعظم نواز شریف کو چیلنج دے دیا۔
لاہور میں میڈیا سے گفتگو میں بابر اعوان نے کہا کہ نواز شریف این آر او پلس کے بغیر پاکستان کی کسی بھی عدالت میں پیش ہو کر دکھا دیں۔
انہوں نے کہا کہ نواز شریف صرف اپنے محلات کی رسیدیں اور منی ٹریل دے دیں۔
پی ٹی آئی رہنما کا کہنا تھا کہ کل ایک عدالتی مفرور نے لندن میں بیٹھ کر کہا کہ 3 رکنی بینچ کا فیصلہ کون قبول کرے گا؟
ان کا کہنا تھا کہ ن لیگ چیف جسٹس آف پاکستان کے خلاف 97ء کا ایکشن ری پلے کررہی ہے۔
بابر اعوان نے یہ بھی کہا کہ ہارا ہوا لشکر جو بھی کر لے الیکشن ہوکر رہیں گے، آئین معطل کرنے والوں سے قوم نمٹ لے گی۔