لاہور (ڈیسک) عالمی شہرت یافتہ پاکستانی گلوکار علی ظفر نے مطالبہ کیا ہے کہ خوجہ سراؤں کو بھی لکس اسٹائل ایوارڈ سے نوازا جائے۔ پاکستان انٹرٹینمنٹ انڈسٹری کے شو لکس اسٹائل ایوارڈز کی تقریب لاہور کے ایکسپو سینٹر میں منعقد ہوئی جس میں علی ظفر کو سال کے بہترین گلوکار کا ایوارڈ دیا گیا۔ گلوکار نے اسٹیج پر ایوارڈ وصول کرتے ہوئے مداحوں کا شکریہ ادا کیا اور لکس اسٹائل ایوارڈ کی انتظامیہ سے خواجہ سراؤں کو بھی ایوارڈ دینے کی درخواست کی۔ علی ظفر کا کہنا تھا کہ ہم اداکار تو نظروں میں آتے رہتے ہیں، شہرت بھی ملتی رہتی ہے مگر خواجہ سراؤں کو ان کے حقوق دینا، انہیں قبول کرنا ضروری ہے، میں چاہتا ہوں کہ انہیں بھی اعزاز دیا جائے۔ انہوں نے اگلے لکس اسٹائل ایوارڈز میں خواجہ سراؤں کے لیے بھی مخصوص ایوارڈز رکھنے کی اپیل کی ہے۔