گاندھی نگر (ڈیسک) بھارتی ریاست گجرات میں دسمبر میں اسمبلی انتخابات ہوں گے اور بھارتیہ جنتا پارٹی عوام کو لبھانے کیلئے طرح طرح کے حربے استعمال کر رہی ہے۔ کشمیر میڈیاسروس کے مطابق ریاست سے بی جے پی کی چاپلوسیوں کی ایسی ایسی خبریں آ رہی ہیں جنہیں سن کر ہر کوئی حیران رہ جاتا ہے۔

وزیر اعظم نریندر مودی مسلسل ریاست کا دورہ کر رہے ہیں ۔وہ جمعرات کے روز ایک اسکول میں گئے تھے اور خبر یہ ہے کہ وہ اسکول ہی اب اپنی جگہ سے غائب ہو چکا ہے۔نریندر مودی نے19اکتوبر کو اسکول آف ایکسی لینس کا افتتاح کیا تھا ۔ افتتاح کے بعد وہ کلاس روم میں کچھ بچوں کے ساتھ بیٹھے اور ان کے ساتھ بات چیت کی تاہم اب سکول پر سوالات اٹھنے لگے ہیں اور حزب اختلاف کی جماعتوں کاکہنا ہے کہ نریندر مودی جس اسکول میں گئے تھے وہ اسکول ہے ہی نہیں۔ عام آدمی پارٹی کے رہنما سنجیو جھا نے ٹویٹر پر لکھا کہ مودی جی الیکشن جیتنے کیلئے جس اسکول میں گئے وہ شام تک غائب ہو گیا، میڈیا اسکول کو تلاش کر رہا ہے لیکن وہ مل نہیں رہا۔ ایک اور رہنما سورو بھردواج نے کہا کہ جس کلاس روم میں مودی جی بیٹھے ہوئے نظر آرہے ہیں وہ ایک فرضی کلاس روم تھا جو شوٹنگ کیلئے بنایا گیا تھا۔ عام آدمی پارٹی ہی کے ایک اور رہنما نریش بالیان نے لکھا کہ آپ فوٹو لینے کے لیے بچوں کو دھوکہ دے رہے ہیں ، بچے تو بھگوان کا روپ ہوتے ہیں۔ کانگریس کے رہنما چندن یادو نے بھی طنز کرتے ہوئے لکھا کل صاحب کی شوٹنگ کیلئے اسکول کا سیٹ لگایا گیا تھا ، سستے سیریل بھی اتنے نقلی نہیں ہوتے جتنے کہ مودی جی کے نیوز شوٹس ہوتے ہیں۔