کراچی (ڈیسک) چین میں بڑے پیمانے پر تباہی پھیلانے والا کورونا کا نیا ویرینٹ بی ایف 7 آخرکار کراچی پہنچ گیا۔
محکمہ صحت کے ذرائع کے مطابق پاکستان میں کورونا وائرس کے بی ایف 7 کا پہلا کیس کراچی کے علاقے گلشن اقبال میں سامنے آگیا ہے۔ ذرائع محکمہ صحت کا کہنا ہے کہ وائرس کی سیکوئینسنگ کے بعد اس کیس کی تصدیق ہوئی ہے، چین کے نئے ویرینٹ کا یہ کیس پاکستان میں پہنچنے والا پہلا کیس ہے۔ متاثرہ شخص کی چین سے کوئی سفری تفصیلات نہیں ہیں، البتہ متاثرہ شخص کے دفتر میں ایک شخص ملنے آیا جس کے بعد متاثرہ فرد میں علامات ظاہر ہوئیں اور تصدیق کے بعد بی ایف 7 سامنے آیا ہے۔ ماہرین صحت کے مطابق نیا ویرینٹ ایک سے دوسرے فرد میں بہت تیزی سے پھیلتا ہے، مذکورہ وائرس نے چین میں بڑے پیمانے پر لوگوں کو اپنا نشانہ بنایا ہے۔