لاہور (ڈیسک) چیئرمین پاکستان تحریک انصاف عمران خان نے کہا ہے کہ ہمیں کسی قسم کا ہتھیار نہیں اٹھانا، فوج بھی میری، ملک بھی میرا، میرا جینا مرنا یہیں ہے باہر نہیں بھاگنا۔
زمان پارک سے ویڈیو لنک خطاب میں عمران خان نے الزام لگایا ہے کہ ہمیں فوج سے لڑانے کی سازش کی جارہی ہے۔انھوں نے کہا کہ یہ الیکشن نہیں جیت سکتے اس لیے پی ٹی آئی اور فوج کو لڑانے کی کوشش کررہے ہیں۔
انہوں نے کہا کہ ایسی کیا غلطی کی ہے کہ ان پر دہشت گردی کے مقدمات بنادیئے گئے ہیں، انہوں نے کہا کہ تقریباً 100 کیسز ہوچکے ہیں، جب باہر نکلتا ہوں میری جان کو خطرہ ہوتا ہے۔
عمران خان نے کہا کہ جمہوریت اور آئین کا قتل ہورہاہے،کسی کو آئین کی فکر نہیں ۔یہ الیکشن کی فضا ہی نہیں بننے دے رہے ،بدھ کو جلسہ کرنا تھا اب پتا چلاہےکل عدالت فیصلہ کرےگی ۔
انھوں نے کہا کہ ملک میں جو حالات ہو رہے ہیں، پوری زندگی ایسے حالات نہیں دیکھے، یہاں کوئی قانون نہیں، جنگل کا قانون ہے۔
عمران خان نے کہا کہ پی ٹی آئی انتشار نہیں الیکشن چاہتی ہے، باربار کہہ رہا ہوں ہمیں کسی قسم کا ہتھیار نہیں اٹھانا، فوج بھی میری، ملک بھی میرا، میرا جینا مرنا یہیں ہے باہر نہیں بھاگنا۔
انہوں نے کہا کہ تمام ثبوت اکٹھے کرکے انٹرنیشنل ہیومین رائٹس اور یورپی یونین کو ثبوت بھجوائیں گے، سب کو بتائیں گے۔
عمران خان نے کہا کہ جھوٹوں کی ملکہ ایسے پھر رہی ہے، جیسے پاکستان اس کی جاگیر ہے، کہہ رہی ہے میرا باپ نیلسن منڈیلا ہے اسے معاف کردو۔