نئی دلی (نیوز ڈیسک) بھارت میں ہونے والے آئی سی سی کرکٹ ورلڈ کپ کے لیے سکیورٹی اور ٹریفک کا جامع پلان تیار کر لیا گیا۔
بھارتی میڈیا کے مطابق اسٹیڈیم تک فینز کی آمد کو آسان بنانے کے انتظامات سمیت ٹریفک اور پارکنگ پلان بھی تیار کرلیا گیا ہے۔
سکیورٹی آفیسر کے مطابق ورلڈ کپ میچز کے دوران ملٹی لیئر سیکورٹی فراہم کی جائے گی، سکیورٹی ادارے اور مقامی ریاستی کرکٹ ایسوسی ایشن کے ساتھ مکمل رابطے کے لیے سسٹم ترتیب دیا جائے گا۔
میڈیا رپورٹس میں کہا گیا ہے کہ ہوٹل سے اسٹیڈیم تک ٹیموں کے لیے محفوظ راستہ بنایا جائے گا۔
کمشنر پولیس کے مطابق اسٹیڈیم کے اطراف میں ملٹی لیئر سکیورٹی کا حصار ہو گا، ہر سکیورٹی لیئر کا الگ مقصد ہو گا اور ہر لیئر میں سکیورٹی اہلکاروں کی مخصوص تعداد ہوگی۔
کمشنر پولیس کے مطابق تشکیل دی گئی مخصوص ٹیم اسٹیڈیم میں پارکنگ کو دیکھے گی جبکہ ہر سکیورٹی لیئر پر فینز کی چیکنگ ہو گی اور میچز سے قبل بھی اسٹیڈیم اور اطراف میں سکیورٹی چیکنگ ہو گی۔
