کراچی (ڈیسک) متحدہ قومی موومنٹ پاکستان کے سینئر ڈپٹی کنوینر سید مصطفیٰ کمال نے کہا ہے کہ اگراب بھی کراچی کے مسائل پر توجہ نہ دی گئی تو یہ نیشنل سیکیورٹی کا مسئلہ بن جائے گا۔
متحدہ قومی مومنٹ پاکستان کے مرکز بہادرآباد پرسینئر ڈپٹی کنوینرسید مصطفی کمال نے ڈپٹی کنوینر انیس قائم خانی و اراکین رابطہ کمیٹی کے ہمراہ پریس کانفرنس سے خطاب کرتے ہوئے کہا کہ ایم کیوایم پاکستان کی جانب سے 12 فروری کو عظیم الشان اجتماع اور دھرنا ہوگا، دھرنا دینا ایم کیوایم پاکستان کا آئینی حق ہے اور اس دھرنا دینے کی وجہ یہ ہے کہ سندھ حکومت اور الیکشن کمیشن ہماری بات نہیں سن رہی کراچی سمیت سندھ کے شہری علاقوں کی مسائل عروج پر پہنچ چکے ہیں اگراب بھی کراچی کے مسائل پر توجہ نہ دی گئی تو یہ نیشنل سیکیورٹی کا مسئلہ بن جائے گا۔ انہوں نے مزید کہا کہ ایم کیوایم کے مطالبہ پر ایک خط کے ذریعے سندھ حکومت نے اپنی غلطی کو تسلیم کرتے ہوئے الیکشن کمیشن کو خط لکھاجس پرالیکشن کمیشن کو یہ اختیار نہیں کہ سندھ حکومت کے خط کی مخالفت کرکے الیکشن کرادیں۔ ایم کیوایم پاکستان نے الیکشن کا بائیکاٹ اس لیے کیاکہ ایک خط کے ذریعے صوبائی حکومت نے 53یوسیز پر اپنی غلطی کوتسلیم کیا اور غلطی تسلیم کرنے کی بعد انتخابات میں حصہ لینے والی تمام پارٹیوں نے کراچی کے پیٹھ پر چھرا گھونپاہے 53یوسیز پر ایک شہر بنتا ہے۔ سید مصطفی کمال کا کہنا تھا کہ12 فروری کادھرنا پیپلزپارٹی کے وعدے اور خط پر عمل کرانے کے لیے ہے۔ صوبائی حکومت کے خط کے بعد کراچی میں کوئی حلقہ بندیاں تھیں ہی نہیں تو الیکشن کیسا؟؟پیپلز پارٹی کی صوبائی حکومت کی متعصبانہ حلقہ بندیوں کے سبب حیدرآباد سے حیدرآبادشہر کا میئر آنا ممکن نہیں ان متعصبانہ حلقہ بندیوں کے ذریعے حیدرآبادشہر میں اندرون سندھ سے میئر لاکر مسلط کیا گیا ہے۔ گورنر سندھ آرڈیننس کے ذریعے حیدرآباد کی تقسیم ختم کریں تاکہ حیدرآباد شہر سے شہری میئر منتخب ہو۔انہوں نے کہا کہ شہری سندھ کے علاقوں کو جیری مینڈرنگ کے ذریعے صحیح گناتک نہیں جارہا دھاندلیوں کے ذریعے کراچی کے نام نہاد بلدیاتی انتخابات جیتے گئے ہیں جو کوٹہ سسٹم ہم پر مسلط کیا گیا آج اس کوٹہ پر بھی اس شہر کو نوکریوں سے محروم رکھا جارہا ہے ۔انھوں نے کہا کہ ایم کیوایم پاکستان فوارہ چوک پر لا محدود دنوں کے احتجاج کے لیے آرہی ہے ہم ریڈ زون میں نہیں جارہے بلکہ اس سے باہر بیٹھ کر بھرپور احتجاج کرینگے۔مصطفی کمال نے کہا کہ سابق صدر جنرل مشرف کی پاکستان کے لئے خدمات لائق تحسین ہیں، جنرل (ر) پرویز مشرف کو خراج تحسین اور انکی مغرت کی دعا کرتے ہیں۔ جماعت اسلامی سے زیادہ منافق جماعت کوئی نہیں کہ وہ جنرل(ر) مشرف کے لیے فاتحہ تک نہیں کرسکے ان کے اس منافقانہ رویے کی سخت مذمت کی جانی چاہیے۔ ایک سوال کے جواب میں مصطفی کمال کا کہنا تھا کہ ایم کیوایم پاکستان کراچی کے ضمنی الیکشن میں بھرپور حصہ لے گی۔