کراچی (ڈیسک) کراچی بھر میں بھکاریوں کی تعداد میں بے پناہ اضافے کے بعد پولیس نے بلاآخر کریک ڈاؤن شروع کردیا۔ 100 سے زائد بھکاری بچوں کو پکڑ کر شیلٹر ہوم منتقل کردیا گیا۔
پولیس ذرائع کے مطابق ایڈیشنل آئی جی کراچی نے تینوں زون کے ڈی آئی جیز اور ایس ایس پیز کو بھکاریوں کے خلاف کارروائی کی ہدایت جاری کی گئیں جس کے بعد پولیس نے کلفٹن، صدر، اولڈ سٹی ایریا، طارق روڈ، بہادر آباد، گلشن اقبال، گلستان جوہر، نیو کراچی، نارتھ ناظم آباد، ناظم آباد، لیاقت آباد، کورنگی، لانڈھی، قائد آباد، ملیر، فیڈرل بی ایریا اور دیگر علاقوں کے ٹریفک سگنلز، چوراہوں اور بازاروں میں کارروائیاں کرتے ہوئے 100 سے زائد بچوں کو پکڑلیا۔ پولیس کے مطابق حراست میں لیے گئے بچوں کو بعدازاں کورنگی میں قائم بچوں کے خصوصی شیلٹر ہوم منتقل کرنا شروع کردیا گیا۔ پولیس کے مطابق بھکاری بچوں کے علاوہ ان سے بھیک منگوانے والوں کے خلاف بھی کارروائی کی جائے گی۔