اسلام آباد (ڈیسک) صدر مملکت ڈاکٹر عارف علوی کا کہنا ہے کہ ڈیجیٹل پلیٹ فارمز کا غلط معلومات یا بطور جعلی پروپیگنڈے کے اوزار استعمال نہیں ہونا چاہیے۔

پاک فوج کے شعبۂ تعلقات عامہ (آئی ایس پی آر) کے مطابق صدر مملکت ڈاکٹر عارف علوی نے نیشنل ڈیفنس یونیورسٹی اسلام آباد کا دورہ کیا۔ صدر پاکستان نے 23 ویں نیشنل سیکورٹی اینڈ وار کورس کے شرکاء سے خطاب میں قومی سلامتی سے متعلق امور پر گفتگو کی۔ صدر عارف علوی نے مستقبل کے چیلنجز کے مطابق معیاری تربیت دینے پر یونیورسٹی کی خدمات کو سراہا۔ صدر مملکت عارف علوی نے خطاب میں کہا کہ بحیثیت قوم ہمیں اپنی سماجی اور ثقافتی اقدار کا تحفظ کرنا ہو گا، کورس کے شرکاء خود کو تازہ ترین پیش رفت سے باخبر رکھیں۔ صدرپاکستان نے مزید کہا کہ طلباء پرامن اور خوشحال پاکستان کے لیے سخت محنت کریں، انفارمیشن ٹیکنالوجی، مصنوعی ذہانت اور مواصلاتی شعبے میں ترقی پر توجہ دینا ہوگی۔ صدر مملکت ڈاکٹر عارف علوی کا یہ بھی کہنا ہے کہ ٹیکنالوجیز خصوصاً ڈیجیٹل پلیٹ فارمز کا استعمال معاشرے کی بہتری کے لیے ہونا چاہیے۔